面斥不雅

小子上星期尾睇左黃子華男神的金盆o郎口, 睇完唔覺得好笑之餘, 心情其實幾沉重

一代男神的棟篤笑, 真係笑唔出, 只有不斷又不斷的黑色幽默同埋自嘲, 難怪佢老哥都無心機再做落去

唔做落去, 或者係"做唔落去", 除左係香港社會已經係NOTHING FUNNY ABOUT 之外, 社會的方方面面都係充斥著唔止係黃藍對立, 更加確切咁睇係"非友即敵"的生活習性及態度

投資上, 樓市面對呢十年八年的大牛市, 好多人水鬼升城隍, 手中有1000萬以上比比皆是, 大呼小叫話租客夠鍾月尾要交租等等....無錯, 1000萬實際在係個一班人做一世都未必有的碼數 (100萬年薪但10% 儲蓄率即係10萬一年, 你賣樓可以有100年的BOTTOM LINE PROFIT, 唔串就假)

以前, 確係條條大路通羅馬, 你有你炒股, 紅籌藍籌紫籌股, 收息股, 莊家股炒得不亦樂乎, 魚翅撈飯年代個個周身法寶 (講得紫籌股都知小子其實股齡有番咁上下...哈哈)

以前大家有個約定俗成的不成文規定, 亦即係面斥不雅. 你理鬼我點搵錢, 你有你收租, 我有我炒股
到呢家非樓即股, WHY NOT BOTH? 點解唔係期權/股票COVERED SHORT CALL PUT + 樓股債先?

原因, 亦都係"面斥不雅". 以前莊家無咁缺水, 炒股一定留番一注錢俾人賺, 呢家嫌LAM得你唔盡!
由輪商開價開始, 小子以前做過證券行, 玩爬格仔, 莊家都無咁狠, 無咁狼, 起碼開+/- 一格俾你走下鬼, 投降輸少少係無問題
到今天, 末日輪扑中收錢都要打個折, 唔好講平時買賣, 夠街貨便MARK 闊個價理得你自生自滅, 只係俾錢日日在電視賣廣告, 睇好又60123, 睇淡就60456

直到期權, 好似公平少少, 實際上都係MARKET MAKER 玩哂, 到你大夾倉 (小子2012年試過), 你真係一年PROFIT 俾番跴佢咁滯, 夾爆你倉迫你CALL MARGIN 絕不手軟
以前大家炒股炒輪都係叫做火中取粟, 細細注刀仔鋸大樹, 是以莊家都"面斥不雅", 你唔搞串個PARTY, 我又唔會搞事.
直到今天, 輪場都係你贏我輸, 又或者莊家食老散, 仲要大大注咁食, 好似子華話齋, 唔怕不雅, 便不用理會面斥不雅呢個約定俗成的潛規則, 其實係吹你唔漲

呢D無恥之徒更加不雅到方方面面, 睇下港鐵班垃圾, 竟然可以明目張膽地做出如恥不堪之事, UGL 同禮頓有無關係我唔知, 但係點解可以俾禮頓起港珠澳, 沙中綫, 高鐵等等大PROJECT 而可以衰得咁貼地, 咁不雅?

以前玫瑰園項目都係一隻大白象, 你估英國佬無CAP你水咩? 以前青馬橋造價10幾億, 20幾年前好L多錢, 但係人地起碼俾番D有番咁上下質素的貨俾你

呢家港珠澳橋大飄移, 沙中綫出事, 班在上位者連記者問佢落唔落台都語焉不詳, 係唔係好似97年前的殺人犯咁要等候董建華發落?落就一個字, 唔落就兩個字, 所有野都含糊其詞, 意圖蒙混過關, 實乃不知所謂

面斥不雅, 對一D唔要面的契弟, 係無L用的

做人要自知, 自量, 自省
勝不驕, 敗不餒; 切忌三分顏色上大紅
有風, 不要駛盡

可惜呢D價值觀同沙中綫一樣, 容容爛爛, 十分不雅, 而面斥都已經無用