2017年8月29日 星期二

收租佬發牌制

自從2016年11月4日政府宣布DSD 由兩倍劃一加到15% 後, 其實等同宣佈買樓收租發牌制開始

任何持有物業者, 再買都要俾15% DSD 俾政府. 如是者, 只得一間只住樓的人更加沒有可能晉身收租佬行列, 因為4M 樓仔都要俾600K, 仲要係14日內大訂即科

如果呢個情況下, 加埋金管局規定收租樓只可以做5成, 即係首期要求係2M, 加上0.6M DSD15, 加埋40K 佣, 未計裝修都已經要預左差唔多270萬出來去買一間400萬的樓, 計一計數, 即係等於要有67.5% 首付.

一般收租佬根本係唔可能付出呢個咁大的首期, 更莫講手持多於2間的人士, 係金管局的規定下係無可能做到按揭咁滯 (即係要FULL PAY)

至於無樓人士, 政府係一直扶持及用政策去趕走一啲好似小子咁"唔上唔落"的收租佬, 因為要俾15% 稅同埋龐大首期係已經嚇退左絕大部份的人

留下的只係新手買家及未有樓的人士, 金管局俾你地借錢買, 只要你有收入, 8成9成借款都唔係問題, 只要你夠收入供得起便可以入手一間, 間接係鼓勵緊無殼蝸牛向上流

不過 DSD 15係有一個好大的壞處, 就係令到持貨者唔會沽出物業, 因為除非你以後唔會買番或者政府取消 DSD 15, 否則你再買番的時候係要俾政府罰15%的樓價, 迫住收租佬唔可以做任何動作, 而新買的買家多為自住下, 即係租盤的盤源係唔多, 間接推升租金, 因為每一年都有新婚夫婦要結婚買/租樓. (PS.政府的供應長久以來都係杯水車薪, 小子自不論述)

但係如果取消 DSD 15, 小子估計個市會升到痴左綫, 因為業主的實力, 相比起無殼蝸牛實在係好強橫. 好多0809年買樓, 約莫係80後 (80-85), 現屆都係事業的高峰, 佢地儲左7年錢, 收左7年租, 比起一班90後及無殼蝸牛, 實力好強大....(當然有好多BLOGGER或者神人生財有道, 但普遍性係佢地都係無咩錢係身),政府只有被迫維持DSD 15, 等大陸人/儲夠錢的收租佬買爆香港D樓為止.

P.S. 借8/9成係有負資產風險同埋資金壓力, 買樓要量力而為. 小子多數係MAX 按5成, 一來出租要求係5成, 二來我唔太鍾意爭人咁多錢

如今要退休, 更加要積極研究其他方法, 而對於80/90/00後更為不公平, 因為又少左一條路俾佢地揀

6 則留言:

  1. 莫講話買多間,換貨轉身都唔得呀

    回覆刪除
  2. 承小子兄所言有樓有牌在手,好難放棄個牌,除非溢價奇高像大陸樓般yield 去到1.0% 則再考慮
    其實本熊等政策放鬆換樓,若1換1唔洗比15% 會賣一或二買間大啲自用,畢竟租租有其限制,難以長久

    回覆刪除
  3. 以前DSD係好難搞, 而家15%係完全無得搞。不買不賣是最佳策略, 苦就苦了那些手持兩層又想換樓的人。

    回覆刪除
    回覆
    1. 小子已有朋友開始免疫了.....15% 講緊係5年租
      對於我等唔上唔落的人來講, 暫時未接受到
      但朋友的忠告係: 遲早要習慣

      刪除
    2. 暫時都係未接受到, 而且論投資回報、論可預測性, 住宅不是我的首選。

      如果有一天我的流動資產組合去到某一個水平...到時generate更多income於我再無感覺的話, 我可能會回歸住宅去提升生活質素。

      不過呢樣再牽涉到居住地問題...可能十年後才需要。

      刪除