牛三

最近小子周街周巷都聽到師奶, 學生同埋D 呀毛呀壽頭係度講股

特別係連D平時唔睇市的人都話邊隻邊隻牛仔好...小子背後感到一陣陣寒意 (但係又唔係睇緊降魔的, 我個名唔係叫馬季, 雖然小子鍾意賭馬)

今日平保輪, 聽日又TENCENT CALL, 好有大時代FEEL, 日日上落幾萬蚊足以養妻活兒

正所謂,瑞聲請我茶煙飯, 吉利企鵝養全家

今日恆指破埋30000大關又係更多無知的小賭徒出埋來撈埋最後一份油水, 小子靜觀其變, 手上40萬股3839 沽清埋佢就收爐

從來民間智慧都係有一定考參價值. 無他, 大數法則也, 大部份升斗市民都係輸家, 俾人係生活中搶奪手中出賣時間"奴力"所得的鈔票, 而最好搶奪的戰場係邊? 股市也, 五花百門, 今日賭大細, 聽日賭番攤, 而偏偏絕大部份人都係懶, 你不理財, 財不理你, 買幾千蚊部KAI 人吸塵器都驗屍咁驗, 點解買幾皮野隻股票就唔了解清楚個基本因素?

雖說話有基本因素唔代表你贏硬, 但係你起碼知自己做緊咩先吖....可惜好多人唔會理, 亦唔想理, 下場只有俾市場先生懲罰, 眼巴巴地將鈔票雙手奉上而不自知, 可悲.

亦由此引伸點解輸股票而又死唔去的人, 最尾死都會買樓呢? 因為股票可以100合1, 再1供10, 供完再合, 合完再供, 根本無法得知老細們係唔係搭個雞棚搶你D錢, 而樓? 老人家講得啱, 最多咪住左佢, 而一件投資物有實際用處又可以炒的時候係唔係比起張公仔紙來得更加"實在"?

雖說樓係升得慢, 同埋稅費又貴, 借錢又難, 仲有租霸等等風險, 但係比起股票合埋眼會跌357成來講, 一D懶人就最鍾意買樓, 無他, 搵到個好租客真係咩都唔駛理咁滯
股票仲要你日日睇住, 困身到唔困身
不過樓市都係會洗牌, 9成按揭即係借10倍孖展買樓, 跌1成即係無哂舊首期, 只不過會唔會CALL LOAN 呢? 小子太後生真係唔知
但如果回看1997-2003年, 幾多人仆街要BBQ, 所以買樓又唔可以係話SURE WIN,如果要小子COMMENT, 我只會講輸起上來唔會輸得比股票更快 (PERCENTAGE WISE)

投資物本身無對錯, 只係投資人本身的思維令到出現左贏/輸的結果
同樣買銀河 (27.HK), 有人8蚊買, 有人80蚊買, 誰能笑到尾先係贏家

樓又好, 股又好, 說明白了都係有錢人剝削窮人的工具而已, 只不過大家生存係呢個世界上面, 不過人生匆匆數十載, 保存邊D資產令到自己慢慢搣到尾, 老來無咁痛苦呢? 各師各法, 因人而異 (可能三公必勝都未可知, 三公, 即公務員, 公緩, 公屋)

有時真係唔怪得D 90後00後申請公屋, 一間公屋加份HEA 工, 得閒去下旅行唔係好過好多中產咩? 有時小子都真係啞口無言, 只係講佢地對自己下一代唔太負責, 不過如果佢串9我話無打算有下一代呢, 佢又錯唔哂