2018年4月3日 星期二

20年之"浩劫"

1997年前, 5仔係股王, 當時約莫係$150 左右, 而灝景灣一手成交價為$464萬 (見下文)

20年過後, 人老左, 樓老左, 今天呢個樓盤賣1,538萬 (其實小子以前番和記4號碼頭, 真心青衣浩刧灣係好L遠), 升左2.3倍.

另一邊箱的0005.....做緊.......80蚊有找

投資永遠都係講門檻, 講智慧, 講心理

易入易出的, 太多引誘, 多做多錯, 唔係有幾多人有呢種智慧可以駕馭市場; 有幾多人可以好似70兄咁一注939 坐得咁穩, 又曉做埋OPTIONS enhance return?

有幾多人可以好似勁贏兄咁一注獨贏3333 恆大?

有幾多人可以好似標竿兄咁分散投資, 又搵到好野兼且死HOLD?

又有幾多人可以好似R兄咁一劍封喉1400萬買港燈?

100 個究竟有無一個?
1000 個究竟有無一個?
10000 個究竟有無一個?

老實講, 小子認為10萬個都無一個


樓上咁多位BLOGGER, 各有方法, 可見條條大路通羅馬, 可惜只限於高智慧(財商)的生物
日日死做爛做的醫生, 律師, 工程師等等, 卻係亂9咁買, 俾AA同投行RM骨水而不自知

常常有講, 你唔理財, 財不理你, 你唔洗錢, 絕對有好多有心之士"幫你"洗左佢

這些年來, 8仔, 330, 27, 1928, 941,2628 買錯都係會令人損手爛腳
個D咩9股債混合基金....更加慘不忍睹

而一個俾全民嫌棄的垃圾山旯旮盤 -  灝景灣, 郤俾到你2.3倍的回報

若果推倒重來, 不知事主會想買5仔定係灝景灣? 

【回歸20載】股壇抗戰21年 黃國英與中資股的愛恨交響曲


【蟹盤變復活盤】廿年「浩劫」已過 灝景灣「復活」升價2倍
一代新盤票王青衣灝景灣,曾經萬人空巷搶購,一場金融風暴累到人人慘變負資產,被稱「浩劫灣」,捱到近年不再受難,最近一個分層單位更以1,538萬元成交,造價打破屋苑史上新高,比一手價升值逾2倍,完全復活。五大97經典蟹貨全部甩難,惟沒有鐵路的深井浪翠園逾廿年僅升14%。

灝景灣前身是油庫,由新地(016)、長實(1113)及華潤合作發展,1997年7月發售第一期,當時可謂全民炒樓,在全港設立多個票站收飛,最後收3萬票,紀錄至今未破。其後金融風暴,平均實用呎價由8,395元,到98年年中已跌至約5,500元,一年跌逾三成。一路跌,跌到沙士,期間有單位跌穿「4」字頭,一個高層實用658方呎單位,成交價215萬元,呎價僅約3,300元,被稱「浩劫灣」。目前第一期尚有約200個單位由一手價買入至今未曾易手,佔一期所有單位約25%。堅持到底的業主近年不單返家鄉,甚至捱出頭來。美聯物業詹皓泰表示,屋苑6座中層A室,實用853方呎,成交價1,538萬元,呎價18,030元,成交價創屋苑分層史上新高。單位一手成交價464萬元,約廿年來升值2.3倍。但資料顯示,當年一手買入的業主,於2002年決定斬纜,以405萬元賣出,輸59萬元或12.7%。而2002年接貨的業主一直持貨至今才沽出,賬面勁賺1,133萬元或2.8倍。至於屋苑分層最貴單位為10座高層B室,實用499方呎,上月中以908.8萬元成交,呎價18,212元。同區指標屋苑盈翠半島有業主揸貨廿年才沽出,利嘉閣彭錦添表示,屋苑6座低層D室,實用676方呎,以1,100萬易手,呎價約16,272元。原業主1998年6月以約332.9萬元購入上址,持貨約20年,賬面賺約767.1萬元,升幅2.3倍。經典97「蟹貨」豈只灝景灣一個,幾乎97年開賣新盤都慘變樓蟹,包括天水圍嘉湖山莊、荃灣愉景新城、深井浪翠園、將軍澳東港城等等。其中天水圍嘉湖山莊平均呎價今年初已升穿1萬元,目前均價約10,025元,比起97年年中5,736元,已升值75%。至於將軍澳東港城受惠於近年新盤越賣越貴,目前均價15,644元,較97年中6,725元,錄得1.3倍升幅。5大樓蟹之中,深井浪翠園「復活」指數最差,最新均價11,365元,比起97年錄約1萬元,僅14%升幅,相信山旮旯、無地鐵是至今跑輸大市的死因之一。反映大市的中原城市領先指數CCL最新報174.94點,較1997年10月高位錄102.93點,都有70%升幅。

10 則留言:

  1. 就連我今年87歲的媽媽都一早知要買樓保財富 !
    佢在香港同廣州買的樓都已升十倍, 只是要我呢個大女幫佢理而得利是佢三個仔 XD !

    回覆刪除
  2. 見你提我, 我又留下言.

    公平D, 其實又好睇你係邊個位計. 2007 HKB 應該好過浩劫.
    話唔埋2027 又唔一樣呢.

    不過, 每十年計一下, 一生人有幾多個十年? 又有幾多人肯由2007 等到2017?

    唔同年紀有唔同人生目標, 個班老人家不如照顧好自己先, 講錢留黎買山地咩....

    如果係廿幾歲仔, SORRY, 1997 時應該無錢買浩劫灣, 2007也沒有, 咁又講黎做乜?

    不如我18XX年買東印度公司啦, 係咪?

    回覆刪除
    回覆
    1. 拗來無謂, 放長雙眼睇吧 !

      刪除
    2. 絕對係TIMING 問題啦, 08年買大貓銀行孖展, 可以發圍兼起PAIR
      所以話各師各法, 無咩對錯之分

      刪除
    3. 我咪就係08買大貓輸到一仆一碌
      要09買先發到達T_T
      --------------------------------
      講返正題, 時間好似有啲錯亂

      1997年大貓最高應上過$297, 即一拆三後$99
      2001年最高$122
      2003年SARS最低見$79.5
      2007年10月上過$153, 供股調整後即$146
      2008年10月最低跌到$75, 供股調整後即$71.5
      2009年3月低位係$33, 供股調整後即$31.5

      如果1997買大貓, 今日連股息應該賺到50-60%左右 (無仔細計)
      如果2007買, 都幾肯定到而家連股息仲蝕緊25%左右
      如果2009低位買, 連股息應該賺緊2.4倍, 唔計槓桿贏浩劫少少

      馬後炮係人都知買乜贏錢, 但我相信條條大路通羅馬, 只係我prefer最少有間自住而已

      刪除
    4. 哈哈, 都係R兄心水清, 我手民之誤打錯97年係150 (其實想打07年...)
      如果係97年的話....結論都係同R兄一樣...
      不過07年老孖到18年 (小子7.25%息)都幾襟計
      打你IB老孖2%/YR 都起碼少左20%-25% RETURN

      刪除
    5. 講呢D, 老孖得股票肯定看破世情。
      33蚊入用盡80%LV, 然後99蚊放, 輕鬆執14倍, 諗起都流哂口水!

      刪除
    6. 樓上又對號,放長雙眼? 衰野我唔講太多了。

      另外兩位數口好好,我亂9估的。

      只係想講,除非屋企人出錢,否則畢業由零開始,未必食得中升浪。

      不如趁後生食女,Google 一下某書

      "不如抱妞"

      刪除
    7. 我係過來人, 我出黎做野果陣 07年, 樓價開始升, 果陣我一蚊儲蓄都無
      做左10年野儲到個一百萬, 但係今時今日100萬連首期都唔夠

      刪除
  3. 睇番上面, 原來2007 HKB 未跌, 2008 才有低價情況.

    回覆刪除