2018年10月19日 星期五

寶翠遊記

尋日口痕約個AGENT問下佢有無得睇寶翠, 竟然有5間-6間有得睇

放工就去左睇下佢咩料子

小子係從來未睇過寶翠園, 因為一直以來都覺得性格比太差, 住戶都係貪佢個西半山地址

但本住睇樓唔可以有BIAS的原則, 姑且去睇一轉

寶翠園前身為公務員合作社 (即係公務員樓), 1989 年同信德等等合作發展, 用單位換單位的方法達成重建方案

https://zh.wikipedia.org/wiki/%E5%AF%B6%E7%BF%A0%E5%9C%92

所以好多原址的一手業主係本身老一代公務員或其二代, 換番來的

一入到去, 大堂正常, 但稍欠貝沙的貴氣, 似係一個比中產好少少 (近似高級版康怡)

第一間5座11H 室, 11樓係第一層, 望出去係南里一號市景, AA話係萬乞頓景, ANYWAY......

困到一個點......

不過寶翠同貝沙灣禮頓山一樣, 就係開則夠離地, 3房則用來開2房, 2房663', 3房905' - 1107' 不等, 所以房間特大, 每一間客房都等同主房, 具有氣派及實用性兼備

只可惜西山樓景為主, 其令人心動的海景都係真係好麻麻, 要玩海景, 貝沙, 九站, 迎海星灣寓, 愉景灣, PARK ISLAND 大把你揀就算退而求其次, 海怡10座海景 (不過打風就GG) .....

AA 當然講到個海景好正....唉, 要買海景, 龍翔花園, 高樂, 均益都有....呢個景.........得啖笑

寶翠3房大部份都有工人房, 1107' 5座H 個工人房係稍為人道少少, 之後睇左3間9XX, 有D無工人套, 有D有都係2呎床都啱啱好, 隔離就係厠所, 仲要係半厠, 有失豪宅之實

至於賣價, 1107' 30M 之後睇個D 905 - 9XX 呎, 都25.8M - 28.6M 左右, 小子睇完都將近45 MINS

另外睇左間一房又係第一層, 開1630 (663'), 對巴士頂, 飛車同OCAMP 睇DAM CHEERS一流....

睇完之後, AA 問小子有無邊間可以傾價, 小子禮貌地回絕. 當然隨後問下佢有無D 大少少的工人房的則時, 區經少少串咀話: 你對工人都幾好架喎...(你暗示我同工人有路?哈哈....)

好明顯佢一係想話我知, 我唔識野, 又或者覺得我低能 (因為小子個樣實在同實際年齡有差別, 難怪佢認為我買唔起, 無問題的)

一行3個AA, 其中一個係小子美記相熟AA, 當然唔會咁同我講野, 另外個串咀區經, 呢個情況睇大碼野常有出現, 記得好早時小子睇西半山同埋天后廟道, AA見到我會問我, 你有無錢 (真係咁講)

普通人會覺得狗眼看人低, 但調轉諗, 你明係混吉, 我無理由浪費時間係你身上, 是以我係唔會反唇相譏

小子只係好客氣咁講, 其實呢家係俾緊間頭房個工人住 (佢地O 咀), 之前睇左貝沙3房, 呢家4000萬左右, 唔想浪費大家時間, 我唔會拎40M 買件自住3房, 所以先睇下寶翠3房個工人厠係唔係都可接受;

呢句其實係講緊俾佢地聽, 小子係睇緊貝沙, 而且睇左唔止一間, 如果行家們覺得呢個客係無料, 其實佢係一間都唔會睇到 , 呢個係真

以前跑馬地我約睇樓, 真係一間都睇唔到, AA 會直接叫你留電話, 收工

不過點都好, 寶翠睇完後我真係無興趣

同埋我應承過, 相熟AA 話佢落貝沙的話, 我會買番件賀下佢, 所以寶翠2房我都唔會考慮, 如果買梗係加多少少買貝沙2房算.

但怕且佢都要等一等, 因為海怡2房9M, 貝沙2房20M, 理性角度來看, 我係唔會買2房貝沙的

除非我痴左綫
 
而因市況來睇, 劈價係在於細價樓, 市價買大碼野真係諗起都唔開胃

14 則留言:

  1. //小子個樣實在同實際年齡有差別, 難怪佢認為我買唔起, 無問題的
    小弟上次谷底去睇樓都有個美記大叔以為小弟同太太白撞。因為小弟同小子兄一樣,個樣細個同齡人仕一截。不過佢都帶我地行左幾間上車盤。到我講完要求後,佢就叫我返屋企等電話。結果,小弟同太太嬲嬲地走去隔離果間地膽鋪,講返同一段要求,另一個資深AA就攞左幾個盤俾我選。結果,小弟從開票到簽約24小時以內完成交易,仲買左個筍盤。兩三周後,美記大叔打俾小弟SELL新盤,小弟同佢講一早已成左,仲買左件筍盤添... 今期出動,又有個AA當小弟白撞... AA擇客是可以理解的。不過,既然淡市,應酬下班小朋友,分分鐘會見到真客仔。人不可以貌相嘛。

    //小子係睇緊貝沙, 而且睇左唔止一間, 如果行家們覺得呢個客係無料, 其實佢係一間都唔會睇到 , 呢個係真
    //以前跑馬地我約睇樓, 真係一間都睇唔到, AA 會直接叫你留電話, 收工
    咁小弟一定無得睇貝沙同跑馬地了...

    回覆刪除
    回覆
    1. 你老兄賞面一齊睇都得

      不過唔好咁謙好喎, 你都有3間薄如紙的磚頭 (我實在太鍾意呢個TERMS, 哈哈)

      刪除
    2. 如紙般到透光,燈影牛肉般入口即溶。。。
      小弟未有耐住得起跑馬地,西半山及貝沙。租間豪宅人住,一則買唔起,二則心理不平衡。等你入住貝沙,小弟同R兄斗滿兄一齊到賀。

      刪除
    3. 哈哈, 未免太睇得起小子了, 小子睇過好一陣子, 都無心動的感覺
      因為出身草根, 所以給貝沙的氣場嚇親, 所以應該都係唔會住貝沙架啦

      刪除
    4. 人命都係如紙般薄啫,三兄
      磚頭點都可以壓死蟹架~~
      快兄,跌市可以趁亂大力D鋤價,睇定多D無壞既
      人性永遠都係只會係慌亂中做錯事,錯價才會浮出來

      刪除
    5. 艾力兄,磚可以係豆腐磚,同朱古力磚。呵呵!

      艾力兄最後一句係金句!現在內外媒吹到貿易戰天咁大,總有人信美帝無敵,一隻手指捽死中國的,出去劈下價吧!

      刪除
  2. 其实我最近都遇到唔少狗眼看人低AA, 实在氣結, 雖然無當場串返佢, 不過以後唔會再搵佢。

    回覆刪除
    回覆
    1. 只係佢地損失
      自己有無錢自己知
      佢可以選擇唔做你生意, 無需動氣

      做人有INERTIA, 慣性係咁, 生意大極有個譜

      刪除
    2. 斗滿兄,快兄講得啱,佢唔做你生意,係佢損失。過隔離鋪頭搵另一個AA好了,毋需動氣。
      不過搵到個識同你搵到筍盤同講到價的AA,比齋有禮貌同有文化的AA重要。畢竟AA係同我地辦事的,夾得來都要能力掂先得。齋懂得夾我地加價的AA,有禮貌服務好都冇用。

      刪除
  3. 想當年, 從來未睇過樓, 卻又被家人不斷催迫 (而佢地自己係全部住公屋居屋, 未買過私樓), 終於膽粗粗地自己行左入AA鋪問
    結果真係得啖笑, 人地問想買邊區, 幾錢筆直, 我全部都答唔出, 反問番人有咩樓揀, 點賣呀
    所以當然係比人當場笑到面黃, 話邊有人咁樣搵樓架? 最後留左個電話咁就打發左我走
    點知隔幾日, 真係有人打嚟搵我, 話邊度有個盤開幾錢喎, 問我去唔去睇?
    由於當時番緊工, 加上氣在心頭, 於是我好有性格咁叫佢留番拜山啦! 然後就 cut 左佢線

    當時大概十年前左右, 其實如果當年既我有買過樓, 明白少少佢地既運作原理, 應該唔會咁樣對佢, 在此特別呼喻一下:
    1. 如家中小朋友未買過樓, 請家中有買開樓人仕務必一齊帶佢去睇下, 並於AA露出白眼時, 適當地開導下佢
    2. 面對AA的確幾無料都要扮四條, 幾睇淡都要講到就快買好急要搵, 否則連想去實地視察研究下的機會係零
    3. 如十年前坑口站做施老闆員工的你, 咁啱睇倒並認出果個就係我, 請讓我對你講句 sorry, 事實上我都受到好大教訓架啦, 結果我遲左兩年入市...

    回覆刪除
    回覆
    1. 風兄, 我只可以講, 機會係留俾有準備的人

      買股票都係一樣, 如果下個月整多次雷曼, 你會買咩? 點解買? 買幾多?
      買銀行股? 汽車股? 證券商股? 地產股?

      平時都要做開功課先知咩叫"平". 好似券商類, 全綫跌到PB<1, 對比起"正常"係平. 但係INDUSTRY 係同中國股市有極大CORRELATION, 咁你對中國個市有無STRONG CONVICTION?

      可見唔止買樓, 買股, 買債都係要平時做功課, 機會來臨時自不然可以有信心地出手
      那怕你個THESIS 未必係全中, 但總要有個說法, 而呢個說法, 係來自於平時做功課

      原諒小子可能意會錯誤, 風兄會唔會有意無意想抒發下對時下年青人買唔到樓的情感, 呢個作為一個廢中的我係可以理解, 但我無意深入討論, 因為每個年代都有其難處及機遇, 無得直接比較.
      小子都係出身公屋, 係好運地早少少出世, 所以早左少少買樓, 亦都因為自己鍾意投資, 所以平時都會研究下, 但同大師級係無得比, 只係ON99 佛系投資.

      但係小子認為,買咩都好, 平時準備功夫係非常重要, 特別係買樓, 更為重要, 並唔係:
      1) 面對AA的確幾無料都要扮四條, 幾睇淡都要講到就快買好急要搵

      係要經常性去睇, 因為一生人, 正常來講只有3次買樓經驗, 面對100萬個住宅, 睇的有無30個? 30/100萬, 出錯機會係好大, 而物業碼數大, 容錯率係好少. 當然呢10年大升市, 買左咩都贏, 無咩好討論, 因為大升市唔係可持續

      好簡單咁講, 如果一個1970-1979年出世, 早結婚的人, 買左樓唔沽, 呢家至少有500萬賬面數, 咁係唔係好叻呢?
      呢樣真係值得大家深思, 因為若果真係"回調"的話, 佢地賬面數係歸零, 而財商無增長的話, 係會好危險.

      刪除
    2. 雲淡兄,以下純粹又為快兄一句有感而發。與你們倆的對話無關。

      //好簡單咁講, 如果一個1970-1979年出世, 早結婚的人, 買左樓唔沽, 呢家至少有500萬賬面數, 咁係唔係好叻呢?
      呢樣真係值得大家深思, 因為若果真係"回調"的話, 佢地賬面數係歸零, 而財商無增長的話, 係會好危險.

      林奮強有一句小弟十分喜歡的話:若果沒法解釋現在,別妄想預測將來。

      奈何今天樓市帳面賺大錢的,又心想一直賺大錢的人,有幾人知自己為何賺大錢?又有幾人真心研究一下當區及本港整體樓市整體供求?又有幾人真係肯MON住央行發鈔機的發鈔速度?

      正如話貿易戰,中國會PK的,有幾人研究過當年美日貿易戰時,日本PK的原因及數據呢?

      賺錢時比輸錢時更值得思考,因為意外之財[冤枉來,瘟疫去],甚至輸鑊甘的機率甚大。財商增長,實比財富增長更為重要。一窩蜂衝去買樓,買中貴價納米樓、劏鋪劏場,輸死真係無命賠...

      刪除
    3. 快兄:
      原意其實只係見你地講開AA狗眼看人低, 有感而發而已... 不過, 又真係可能解釋倒點解有班後生仔一世都買唔倒樓!
      "經常性去睇"呢點我覺得知易行難, 作為工資奴隸, 大部份時間都賣晒了, 而我亦唔似快兄咁有實力, 搵倒個AA碼住幫自己做野, 到需要搵樓時, 往往只能靠臨急抱佛腳, 摶大霧呃啲盤嚟睇做功課
      此我之前數次換樓或搵租盤都係咁做, AA們好現實, 一個生客入嚟, 第一時間只會估你開單機會高唔高, 或者開倒幾大張單

      三兄:
      雖則解釋現在, 明白晒過去數據及各種結果的原因是件好事, 但離預測未來還是很遠, 而世事往往是出人意表, 大概只有提高勝算而已
      我覺得"為何賺大錢"呢個問題, 答案可能比想像中簡單: 肯落手落腳做功課, 然後肯拋個身落場摶, 同埋肯堅持信念吧!

      刪除
    4. 無計, 大家都係搵食
      你做SALES 但有人混吉, 一定唔招呼佢

      同埋小子都係窮困出身, 公屋租樓咩都玩齊, 實力唔係咁強大

      AA 嘛, 人一個, 佢知你3年幫佢做一單, 朋友買你又幫手介紹, 自不然會好面口

      呢家小子睇中半山都係約唔到. 一來無AP PP 等等名錶, 二來無車, 一睇就知係窮人買唔起, 今時今日我睇樓都受氣架

      刪除