2016年10月24日 星期一

客觀量度自身財務水平 #1 儲蓄率


客觀量度自身財務水平 #1 儲蓄率

小子眼見父母, 營營役役到老來都係僅夠生活 (定生存?), 萬一仔女唔生性, 分分鍾老來過唔到世 (其實小子母親會於不久將來退休)

作為一個80後, 一個仲有機會的80後, 點先可以避免老來呢D咁尷尬的場面呢?

首先一定要睇一樣野, 就係儲蓄率 (真係FOR 45 樓下的朋友, 因為45+, 如果仲係一窮二白, 咁同PK 已經不遠了....請恕我直言)

打個比喻, A君搵20萬一個月, 但係佢洗足18萬一個月,每月淨2萬

如果呀B君, 搵5萬, 洗3萬....即係每月淨2萬 

同樣大家都係每個月淨2萬, 但係2萬係佔A 的月消費1/9 即係頂到4日
而呀B, 同樣2萬, 係可以頂2個月!!!

所以, 係小子眼中, 時間一過, 呀B 將會有足夠底氣同老細SAY BYEBYE
而A 呢? 佢同等死係無分別, 因為佢老細可以揀住佢條頸, 俾D豬頭骨呀, 屎呀佢食, 而佢亦都要笑住食, 真係慘.............

小子只會睇每個月你有幾多錢淨/支出, 而唔係你搵幾多, 搵幾多係一個虛數, 唔好講你做生意又好, 打工又好; 生意一唔好, 你又係PK, 打工更甚, 老細一句叫你番屋企食自己, 你就手停口停....當然係香港, 你肯做D下欄野, 無話死人, 但係你份人工, 你眼中所謂的"市場價值", 將會係個一刻歸"零"

成件事無關乎2樣野:
1. 開源
2. 節流

所以, 要凸破呢個死門, 防止老細搞你, 又或者生意大環境唔就, 就係先控制支出, 養成一個良好的洗錢習慣, 並儲蓄 儲蓄 儲蓄 (好重要, 要講3次), 準備糧草過冬. 因為你唔會知冬天幾時搵到上門.............

初心者一定要有20% 以上儲蓄率, 並計下20% 係佔成個月的多少日 (計法而在樓上SHOW左出來).

進階者, 可以用股票/買樓收租等等法門, 去加大自己個"儲蓄率", 當然, 買錯樓/股係會死人, 各位讀者風險自負, 又或者請教下身邊專家(唔係個D咩依賴SELL你買野的理財顧問), 因為大家一齊買滙豐, 上一代150 蚊買輸到嘔血, 而係28蚊供股個D係笑到傻左.....

呢件事係有小朋友的家庭係好難做到...因為D家長要鬥, 要PLAYGROUP, 要咩咩物物....小子好明白有D錢一定要洗
但狂洗錢的下場只係得一個....老來頭痕. 沒有第二個後果, 除非你中六合彩.

未婚者, 積谷防飢, 有家庭者, 必需嚴控支出同埋唔好盲目洗錢.

唯有洗得精明, 洗得其所, 先會有機會捱過未知的寒冬. 香港經濟轉差, 俾大陸取代已係不爭的事實, 時間唔會等人,你不規劃自己,社會就會規劃你

1 則留言: