肯輸的人先有資格贏，小子的壓測

其實每一次買樓都係賭命的行為，好簡單，當你一個月10皮野人工咁計，1000萬樓係等於一個人差唔多9年的收入，係收入唔係淨番的錢，所以當有個朋友剛問問小子買唔買的話，本質上你覺得賭得過的，去馬。

除左賭得過的，去馬。作為投資者，小子經常強調：肯輸的人先有資格贏

無他，每一次買賣都係一個賭局，升你贏，跌你輸。買股票價錢升跌計埋利息收入的總和叫做TOTAL RETURN，當收息唔夠冚價錢升幅，TOTAL RETURN 便是負數。

例子好似100蚊買滙豐，10年前買941 中移動，5蚊接左3988，以至買左劏舖，山卡拉車位等等。當你沽唔出，又或者要賤價沽出而本金的損失大於咁多年的收租，便是輸，係絕對性的一個概念。

除此之外，亦都有通漲要去BEAT。每年4%的INFLATION，赤裸裸地說明，如果齋HOLD CASH 而唔出手，每年你係會輸4% (其實止唔止4%??!)

簡而言之，在香港生活，係焗賭。

而就因為香港近來所發生的政治風波，好多投資者都表示好怕寒冬來臨，小子即管分享下自家用的壓力測試2條

1. 供樓不超過兩公婆最低收入的一份子的收入

假設家庭收入80,000，老公搵50,000，老婆搵30,000，供樓收入絕不能超過30,000
咁做係防範於是但一條友俾人炒Q左供唔起樓收皮。
而高人工代表俾人炒的機會率增加同埋有機會即時搵唔番個份人工，所以不過30,000 已係防風第一重措施

如果50,000收入個條友係積極搵工，怕且20,000 都有相當大機會搵到

何況呢家做保安都18K.....譚仔姐姐都16K....要做，在香港肯做的話多數唔會太大獲，但人到40幾50，俾人炒的機會愈來愈高，做足準備唔好到時一褲都係。

而18K + 30K = 48K

點差都頂到幾棍......

又咁唔好彩老婆俾人炒埋搵得15K (30K --> 15K)，其實都叫做好勉強頂到

2. 出租樓預租金跌50%都頂到

好多業主都有個好強的BELIEVE: 租金跟通漲走, YES & NO. 在回帶去2003年，係平到PK都無人租，而租金係現價50%左右。
要預埋你老哥失埋業又租唔到又死唔去先係壓測LEVEL 2，而唔係金管局個D鬆到唔鬆的壓測。

如果頂唔到的話，可以先考慮一個BACKUP PLAN，如果有CASH FLOW ISSUE 會沽邊間同埋點做，咁做足功夫便可以認真考慮賭唔賭一舖了。