出租樓宇注意事項

有網友近日收歸左物業以作出租, 問到小子點樣搞租務事宜, 小子多數係佛系收租佬, 略略談下, 睇下有無高手補充

1) 出租物業時, 切忌叫價進取, 因為好多租霸係無諗住交租, 而叫價進取多數一係新裝修 (自抬身價), 作為租霸當然揀個新裝單位去住得舒服, 反正都唔交租, 你叫多3幾千, 對佢地無意義

2) 一定要同租客見面, 同佢地傾下計, FEEL 下係唔係正常人, 其實香港欠租率好低, 租霸更少之又少. 人係一個好奇怪的動物, 見工同租樓俾人一樣, 一眼望一望, 講幾句大約知係唔係同路人, 如果你係心善的話, 你遇到的人, 會係ALIKE, 好唔科學, 但係呢個係堅的, 近朱者赤就係咁解

3) 了解下佢做邊行, 同埋傾下工作. 順便了解佢地係唔係負能量人士. 談吐絕對係了解一個人的性格及遇事的處理方法. 如果一個人工作有問題便RESIGN呀, 攬炒呀等等, 或者口中好多怨氣, 基本上, 你俾層樓佢, 佢係唔會好好愛惜你的樓, 幾平幾貴租都係無用

4) 了解佢點解租樓. 呢個可以同佢SOFTLY 咁傾, 都係個句, 大家關係對等, 你可以站係佢立場問下佢, 好似小子個海怡租客咁, 係沽左樓等移民, 講到明住5年左右. 此其一避免係租霸 (供斷左沽野走人, 成10M 在手, 佢一定唔會攪事), 二來, 知道你個佣係俾一條約吖, 定係下年又係會走人

5) 了解佢鍾意你個單位D咩...可以係裝修, LOCATION, 價錢等等. 直觀地已知及推測到咩原因佢地會唔租 (可以係搵到平過你, 可能係小朋友入學, 等等)

6) 記住先過數, 後俾KEY. 因租霸好鐘意FRIDAY 俾票你, 等你彈票收KEY 入去往, 到時無仇報. 一定記住, 先收票, 後過數再叫AA 放KEY 俾租客, 大家平等關係IN GOOD TERMS

7) 記住客氣同埋有同理心, 租客係唔希望你打攪佢, 你做業主都係. 小子多數同租客講, 如無意外, 唔會加租, 但係有要求就係我先執好個單位俾你, 你無咩意外唔好打攪我, 但如果有壞, 我係會即整 (好多業主就唔同, 話我好地地俾你, 壞左野扣按金, 唔同你換等等) 其實你層樓仲貴過D傢私, 唔好本末倒置, 反而大家一早講明, 均均真真, 多數OK的都係正常人, 因為租客都唔鍾意你無啦啦加租迫佢走, 亦都唔想破壞大家關係. 中國人係講關係的.

8) 盡量唔好租俾公司客. 因為公司要查SEARCH, 如果租俾SHELL COMPANY就好煩. 不過多數公司都唔係有問題, 純粹係我唔鍾意而已

9) 盡量租俾家庭客, 唔好怕佢攪你的裝修, 家庭客一般係留耐D,常識

10) 放賣層樓前好同佢地單聲 (如果), 因為都係個句, 人家簽唔簽交吉影響到你VALUATION. 不過小子未試過連約沽, 亦好少沽野.

完事後小子多數私人俾1000 AA, 因為你愛惜佢地, 佢地先會幫你搵好客, 錢, 係用來駛
不過99% 人都係唔會咁做. 覺得俾左個幾千蚊佣係應份, 但係佢地都係收3K 左右
呢個係個人PRACTICE 而已
人同此心, 如果你老細對你咁好, 你會唔會想搞串個PARTY?