身邊同事又去旅行, 我好奇問下佢, 佢話: 我上次去大板, 今次去大板+京都嘛! 機票又平! 一人駛三幾千!
小子真係想講, 一個人窮, 一定有佢的原因, 可以係屋企人唔生性, 可以係自己唔控制自己洗費, 而最多人的死症就係旅行(尤其係短TRIP)
兩個人去一次大板, 小則一萬, 大則三四五萬, 取其中位數計, 當你一下駛20,000 連食住5DAY, 一年去兩次, 就無左40,000.
相比起一個月入30,000的中產來講,即係一年駛左11%的淨收入.
唔好講買唔買樓, 11%儲起來, 5年都20萬, 10年40萬,其實相比起上來, 到個市唔好的時候, 你買股票又好, 失左業用來頂住個雞頭都好, 都好有用
或者如果到時經濟唔好, 建行跌到4蚊, 淘大跌到120萬的時候, 呢40萬係足以令到你買到一個改變一生的機會
當然買左唔代表贏, 亦唔代表你係大富大貴, 但出手的底氣, 係你每日日積月累番來的成果
可能好多人睇完會媽媽聲, 覺得DLLM無得去10年旅行你都ON9 的...我要活在當下享受人生
其實沒有問題的, 只係一個PACKAGE. 你無可能話月月去旅行又有錢淨掛? 這個係唔合邏輯的, 除非你有父幹 (有錢係任性的, 你懂的)
正所謂: 條路自己揀, 仆街唔好喊
講番我同事, 一家4口工人姐姐PLAYGROUP七人車全齊,上有高堂下有兒女, 我都唔知佢有無錢淨, 不過真係要清楚自己做緊D咩, 同埋所有野係一個套餐........(小子自己都有去旅行, 唔係話扎炮式慳錢)
小子話齋, 你今天唔規劃你的人生, 社會會規劃你
沒有留言:
張貼留言